Home Aktyalite Ayiti : 15 timoun mouri boule nan ofelina yon legliz

Ayiti : 15 timoun mouri boule nan ofelina yon legliz

by Kreyòl Enfo

Kreyòl Enfo, 14 fevriye 2020 .- Yon gwo dife eklate nan ofelina legliz « Compréhension de la Bible » nan zòn Fèmat, komin Keskòf, nan lanwit jedi 13 fevriye 2020 an, kote pou pi piti 15 timoun peri.

Enfòmasyon ki rive jwenn redaksyon Kreyòl Enfo presize plizyè pami viktim yo pat boule grav. Yon ajan pwoteksyon sivil ki te vizite lokal dram nan jodi a konfime plizyè nan timoun yo mouri akoz pwoblèm laswenyay. Li presize 2 mouri kangannen nan lokal ofelina a, lòt 13 yo mouri nan yon lopital kapital la.

Ofelina legliz « Compréhension de la Bible » la pat gen pèmisyon pou l fonksyone depi 2013, daprè yon rèsponsab nan Enstiti byenèt sosyal ak rechèch (IBERS). Sèlman 35 pami 754 ofelina ki genyen nan peyi ki gen otorizasyon pou fonksyone.

Direktris IBERS la, Arielle Vildouin, ki denonse move kondisyon opelina a, presize te gen 66 timoun nan ofelina a. Sèlman 3 granmoun te akonpaye timoun yo nan moman dram nan.

Enfòmasyon yo fè kwè se balèn ki te limen nan lokal ki ta lakoz dife sa eklate. Toutfwa, otorite yo anonse yo pral mennen ankèt pou limyè sou dife sa.

Kreyòl Enfo

0 comment