Avan 29 mas, Jean Henry Céant dwe remèt machin Leta ki nan men l

Kreyòl Enfo, 25 mas 2019 .- Pandan yon konsèy gouvènman vandredi 22 mas pase a, Premye minis pou yon ti bout tan an, Jean Michel Lapin, egzije tout sitwayen remèt machin Leta ki nan men yo si lalwa pa ba yo privilèj la.

Jean Henry Céant ki fenk pèdi pòs Premye minis la pa epanye anba mezi sa. Jean Michel Lapin pase Sekretè jeneral Primati a lòd pou prepare yon rapò sou kantite machin Leta ki nan men ansyen Premye minis la epi pran tout dispozisyon pou tout machin lalwa pa prevwa ki nan men Céant retounen nan Primati avan 29 mas.

Jean Michel Lapin vle pote plent tou kont tout endividi ki pa gen tit ak kalite pou itilize machin Leta. Nan sans sa, minis yo dwe soumèt bay Primati lis tout machin ki nan ministè ak Direksyon jeneral ki anba kontwòl yo.

Premye minis pou yon ti bout tan an mande minis jistis la tou pran tout dispozisyon, depi premye avril k ap vini la a, pou lapolis arete tout machin san otorizasyon k ap sikile aprè 7:00 tè nan aswè.

Kreyòl Enfo