Kreyòl Enfo, 25 jen 2020.- Ansyen chèf Fwon pou Avansman ak Pwogrè Ayisyen yo (FRAPH), Emmanuel Constant alyas Toto reponn pou premye fwa, aprè midi jedi 25 jen, kesyon lajistis nan vil Gonayiv. Kolaboratè Kreyòl Enfo (KE) nan site lendepandans la konstate plizyè inite espesyalize nan polis nasyonal Ayiti a te akonpaye Toto Constant nan moman li t ap rantre nan lokal pakè a.
Sibtiti komisè gouvènman Mèt Adisson Durogène ki konfime li te tande ansyen chèf FRAPH la pandan anviwon 15 minit pat bay twòp detay sou sak te di pandan rankont sa. Li eksplike sèlman eksplike se te yon premye kontak otorite nan jiridiksyon an te genyen ak Emmanuel Toto Constant.
Mèt Adisson Durogène presize mouche Constant ki fèmen kounye a nan prizon Gonayiv ap gen pou prezante devan lajistis nòmalman nan jou k ap vini la yo. Li pwofite remèsye chèf pakè Kwadèboukè a, Mèt Maxime Auguste, li di ki te kolabore ak pakè Gonayiv pou pèmèt Emmanuel Toto Constant prezante nan jiridikasyon Gonayiv la jodi jedi a.
Ansyen lidè Fwon pou Avansman ak Pwogrè Ayisyen yo te mele nan masak sou plizyè fanmi nan katye Raboto,Gonayiv, 22 avril 1994. Lajistis nan pi gwo vil depatman Latibonit la te deja kondane Emmanuel Toto Constant (dèyè do l/kontimas) pou pase tout rès vi l nan prizon pandan li te nan peyi Etazini.
Otorite amerikèn yo depòte kriminèl la madi 23 jen pase a. Ronald « Roro » Nelson se youn nan pèsonaj pwòch pouvwa Tèt Kale a ki te al akeyi Toto Constant nan ayewopò entènasyonal Tousen Louvèti.
Kreyòl Enfo