Ansyen depite Jean Fenel THANIS anba kòd pou zafè dwòg

Kreyòl Enfo, 6 mas 2019 .- Ansyen depite Okay/Ilavach (île-à-vache) nan 49e lejislati a, Jean Fenel THANIS, jwenn arèstasyon l madi 5 mas la nan komin Gantye, depatman Lwès. Ajan inite espasyalize Polis nan Fwontyè yo (POLIFRONT) fouke ansyen palmantè a pou trafik dwòg.

Depite Jean Fenel THANIS ki te ranpòte eleksyon 2010 yo anba chapo pati Repons Peyizan te akonye ak 2 lòt endivididi, pami yo yon jamayiken ki pote non Keshuss Cambell. Yo te nan yon machin Nissan Patrol ki t ap pran direksyon Repiblik Dominikèn.

Nan machin nan, fòs lòd yo dekouvri plis pase 400 kilogram mariwana (dwòg) ki te kache anndan 9 sak, daprè enfòmasyon yon sous nan Lapolis pataje ak Kreyòl Enfo.

Ansyen depite a ansanm ak endivididi ki te akonpaye yo deja transfere nan Direksyon Santral Lapolis Jidisyè (DCPJ).

Kreyòl Enfo