Andre Drummond ak Mike Conley se meyè jwè 21e semèn NBA a

Kreyòl Enfo, 12 mas 2019 .- Lig nasyonal baskètbòl ameriken an deziye jwè ki te plis briye pandan semèn ki sot pase a nan NBA a.

Konferans lès

3 viktwa, zewo defèt se bilan Detroit Pistons soti 4 pou rive 11 mas. Pistons yo reyisi bon pèfòmans sa gras ak Andre Drummond ki fini meyè jwè konferans lès la pou semèn pase a. Pandan peryòd sa, Drummond woule ak yon mwayèn 22.3 pwen, 18 rebon ak 66 pousan chout reyisit
nan chak match. Pivo Detroit la ranpòte tit sa pou 4e fwa nan karyè li.

Konferans lwès

Nan konferans lwès la, se Mike Conley Jr ki fè lalwa pandan semèn pase a. Gras ak yon mwayèn 31.3 pwen , 4 rebon ak 7.7 pas nan chak match, Mike Conley pèmet Memphis Grizzlies fè 3 viktwa sou 3 match li jwe pandan peryòd sa. Aprè 12 sezon NBA ak plis pase 800 match, menè Memphis la, ki blese anpil, ranpòte tit sa pou premye fwa nan karyè li.

Kreyòl Enfo