Akoz jalouzi, yon ayisyèn mouri ak 20 kout sizo nan peyi Brezil

Kreyòl Enfo, 17 avril 2019 .- Marie Daphney Romulus, 28 lane, se yon jèn ayisyèn ki pèdi lavi l anba kout sizo, ayè madi 16 avril la, anndan yon estidyo nan vil Extrema, Eta Minas Gerais, peyi Brezil.

Enfòmasyon Polis Militè (PM) pataje ak Kreyòl Enfo konfime se ansyen konpayèl viktim nan, Rubens Sébastien Blaise, ki asasinen l paske li pat dakò mete bout nan yon relasyon yo te genyen depi plizyè lane.

Otorite yo rankontre kadav viktim nan anndan lokal krim nan ak anviwon 20 mak kout sizo.

Lapolis mete lapat sou ayisyen yo sispèk ki komèt krim nan. Jèn gason sa ki gen 27 lane rekonèt se li menm ki touye Marie Daphney Romulus paske li t ap twonpe l.

Rubens Sébastien Blaise fèmen ki fèmen nan prizon pral reponn kesyon lajistis pou moun ki touye fanm (feminisid).

Kreyòl Enfo