Home Aktyalite Akizasyon kadejak kont Dadou Jean-Bart, DCPJ louvri yon ankèt

Akizasyon kadejak kont Dadou Jean-Bart, DCPJ louvri yon ankèt

by Kreyòl Enfo

Kreyòl Enfo, 7 me 2020 .- Brigad pwoteksyon timoun (BPM, sig nan lang franse) deja louvri yon ankèt sou akizasyon kadejak k ap peze sou do prezidan federasyon ayisyèn foutbòl la, Doktè Yves « Dadou » Jean-Bart, daprè youn nan pòt pawòl Lapolis la, Gary Desrosiers.

Prezidan federasyon ayisyèn foutbòl la, Doktè Yves Jean-Bart

Enspektè Polis la raple, nan yon konferans pou laprès, jedi 7 me a, BPM se yon branch nan Direksyon Santral Polis Jidisyè (DCPJ, sig nan lang franse) ki rèsponsab dosye maltretans ak abi seksyèl sou timoun.

« Brigad pwoteksyon timoun yo pran rèsponsabilite pou mennen ankèt sou dosye sa paske akizasyon yo fè kwè ta gen kadejak sou timoun nan Sant « Camps Nous », Kwadèboukè a», presizyon Gary Desrosiers ki bay garanti « tanzantan popilasyon an ap gen detay sou avansman ankèt sa ki deja kòmanse».

Enspektè Gary Desrosiers pandan yon konferans pou laprès

Malgré plizyè ankèt deja louvri sou dosye sa, prezidan federasyon ayisyèn foutbòl la di li pap demisyone. Dadou Jean-Bart ki kontinye voye akizasyon sa yo jete anonse li pral pote plent tou devan lajistis.

Kreyòl Enfo

0 comment