7 mwa san touche, chofè ak sekirite depite yo simen fatra nan lakou palman an

Kreyòl Enfo, 26 mas 2019 .- Latwoublay nan palman ayisyen an, jodi madi a, kote chofè ak ajan sekirite depite yo tanmenm yon mouvman pwotestasyon nan lakou chanm depite a pou reklame lajan 7 mwa depi yo pa janm touche.

Pou fè tande vwa yo, pwotestatè yo klaksonnen machin epi simaye wòch ak fatra nan lakou chanm depite a. Yo te bloke tou yon pati nan rantre Sena Repiblik la.

Anplwaye yo kritike prezidan Gary Bodeau ak rès manm biwo chanm depite a yo di k ap woule yo nan farin. Pwotestatè yo anonse y ap kontinye revandike jiskaske yo touche.

Kreyòl Enfo