7 « mèsenè » etranje yo kite peyi a san Prezidan ak Premye minis la pa konnen

Kreyòl Enfo, 21 fevriye 2019 .- Prezidan Jovenel Moise ak tout Premye minis Jean Henry Céant pat konnen si sèt (7) etranje pami uit (8) endividi lapolis te arete ak gwo zam yo kite peyi a, ayè 20 fevriye a, daprè enfòmasyon konseye chèf Leta a, Jude Charles Faustin ak pòt vwa Premye minis la, Pascal Adrien pataje ak laprès.

Prèske 24 èd tan aprè endividi sa yo fin《transfere》nan peyi Etazini, Laprezidans ak Primati di yo toujou ap tann eksplikasyon nan men minis jistis la konsènan dosye sa. Sepandan, jounal Miami Herald ki rapòte pawòl yon pòt vwa depatman Leta ameriken fè kwè otorite ayisyèn yo te patisipe nan demach pou etranje sa yo kite Ayiti.

Aprè midi dimanch 17 fevriye 2019 la, Lapolis te mete lapat, nan zòn Bank Repiblik Ayiti a (BRH), sou yon gwoup 8 endividi ak gwo zam fann fwa.

Kreyòl Enfo