Home Aktyalite Grèv kont kidnaping : tout aktivite bloke nan divès vil peyi a

Grèv kont kidnaping : tout aktivite bloke nan divès vil peyi a

by Kreyòl Enfo

Kreyòl Enfo, 18 oktòb 2021.- Grèv sendika chofè yo te lanse pou denonse ensekirite, kidnaping ak pwoblèm gaz ki pa genyen nan ponp yo rèspekte jodi lendi 18 oktòb 2021 an. Tout aktivite bloke nan zòn metwopolitèn Pòtoprens ak divès vil pwovens.

Kolaboratè Kreyòl Enfo (KE) k ap virewon nan zòn metwopolitèn Pòtoprens lan konstate pòt tout lekòl rete fèmen. Kèk grenn elèv ki gentan te pran lari a oblije retounen lakay yo.

Transpò piblik la prèske pa fonksyone tou nan kapital la maten lendi an. Sitwayen ki pral regle aktivite yo oblije mache plizyè kilomèt oubyen peye motosiklèt. Se sèlman kèk grenn machin prive ki pran lari a.

Jakmèl, grèv jeneral la rèspekte. Prèske tout aktivite bloke nan vil la kote kawoutchou ap boule nan plizyè katye. Lekòl ak enstitisyon piblik yo pa fonksyone.

Okay, kawoutchou ap boule nan Boulva 4 chemen. Yon gwoup endividi mete dife nan yon machin ki t ap tante travèse. Aktivite komès yo paralize tou nan pi gwo vil depatman Sid la ki te deja frape anba tranbleman tè 24 dawout pase a.

Sendika chofè yo ki jwenn sipò plizyè lòt sektè nan peyi a lanse yon grèv san limit pou fòse Leta pran rèsponsabilite l kont bandi ki pa sispann fè san koule nan peyi a.

Kreyòl Enfo

0 comment