Zile Lagonav : yon ti bato koule, sekouris yo deja jwenn 2 kadav epi sove 7 lòt pasaje

👤 Kreyòl Enfo

Kreyòl Enfo, 16 me 2021.- Yon ti bato ki rele « Etwal Briyan » ki t ap soti Monwi pou ale Ansagalè, zile Lagonav, koule nan lanmè aprè midi samdi 15 me 2021 an. Ti bato sa ki t ap transpòte anviwon 20 pasaje te kite waf la bò 5 kè nan aprè midi.

Direktè Sèvis Maritim ak Navigasyon Ayiti (SEMANAH, sig nan lang franse), Éric Prévost, fè konnen sekouris yo jwenn kadav 2 viktim nan mitan lanmè a epi sove lavi 7 lòt pasaje.

Pami moun ki rive sove yo genyen kapitèn ti bato a, yon anplwaye ministè komès ak yon ti bebe 3 zan, daprè presizyon Éric Prévost. Direktè SEMANAH konfime sekouris kontinye ap bouske anviwon 10 lòt pasaje ki te nan ti bato « Etwal Briyan  » an .

»   Yon ti bato koule nan lanmè zile Latòti, pou pi piti 14 moun mouri

Rèsponsab Sèvis k ap kontwole aktivite sou lanmè a fè kwè yo te fè enspeksyon sou ti bato a avan menm li te deplase. Yo souliye « Etwal Briyan » pat gen twòp moun nan moman li t ap kite Monwi pou pran lanmè a.

Kreyòl Enfo 

ou ka enterese