Wanament : 4 polisye ki mele nan lanmò brital sitwayen Péguy Siméon an fèmen nan izòlman

👤 Kreyòl Enfo

Moman kote yon ajan UDMO monte sou do yon bis epi voye sitwayen Péguy Siméon anba

Kreyòl Enfo, 13 me 2021.- Kat (4) ajan UDMO ki te maspinen Péguy Siméon, samdi 8 me pase a, epi pwovoke lanmò li, lendi 10, fèmen nan izòlman. Se Direktè depatmantal polis Nòdès la, Fritz Saint-Fort, ki konfime enfòmasyon pou redaksyon Kreyòl Enfo (KE).

Nan plizyè bout videyo k ap fè laviwonn rezo sosyal yo tout moun ka remake Péguy Siméon, 31 lane, te twouve l sou tèt yon gwo bis ki fè transpò Wanament – Okap. Plizyè polisye ki te vin parèt te mande pou jèn gason sa desann machin nan. Péguy Siméon te refize desann epi menase polisye yo. Youn nan ajan UDMO yo te reyisi monte sou do bis la epi pran jèn gason an voye l anba tankou yon vye bout sak. Lòt twa (3) polisye ki te atè a maspinen Péguy Siméon ak kout baton malgre li te tou menote.

»   PNH : nan dis jou, pou pi piti douz (12) polisye tonbe anba bal

Jèn ayisyen sa otorite dominiken yo te fenk voye vini Ayiti paske yo di li pat gen papye legal ta pral rann dènye souf li sou kabann lopital lendi 10 me pase a.

Lanmò sitwayen sa pwovoke kòlè ak endiyasyon anpil moun nan sosyete a. Sou rezo sosyal yo, sitwayen yo mande rèsponsab yo pran sanksyon kont tout polisye ki mele nan krim sa epi remèt dosye bay lajistis.

Kreyòl Enfo

ou ka enterese