Yon gwoup dirijan MOPOD pandan yon konferans pou laprès
Kreyòl Enfo, 13 janvye 2021 .- Mouvman Politik Popilè Desalinyen (MOPOD, sig nan lang franse) pozisyone l nan deba ki genyen nan sosyete a sou dat prezidan Jovenel Moise dwe kite pouvwa a. Nan yon konferans pou laprès jodi mèkredi a (13), kòdonatè MOPOD la Agwonòm Jean Andre Viktok mande prezidan Repiblik la rèspekte atik 134-2 konstitisyon an epi kite pouvwa a 7 fevriye 2021.
Rèsponsab MOPOD yo mande tout fòs viv peyi a leve kanpe pou fòse Jovenel Moise bay pouvwa a si li ta vle fè rezitans. Serge Jean Louis felisite divès sektè nan opozisyon an ki mete ansanm pou sòti kalandriye mobilizasyon jeneral nan tout peyi a.
Mouvman Politik Popilè Desalinyen voye yon pinga bay kominote entènasyonal la sitou Òganizasyon Leta Ameriken yo (OEA, sig nan lang franse) li di ki vle kontinye sipòte pouvwa Tèt Kale a nan vyole konstitisyon an. Rèsponsab MOPOD yo fè kwè yo pap pran lòd nan men okenn enstans nan entènasyonal la sou zafè politik peyi a.
MOPOD siyale se lamizè, grangou, kòripsyon ak ensekirite ki karakterize pouvwa Tèt Kale a. Dirijan politik yo di peyi a paka rete nan sitiyasyon malouk sa, wè pa wè fòk Jovenel Moise kite tèt Leta a 7 fevriye k ap vini la a.
Kreyòl Enfo