4 ajan dwànye mouri Malpas : ADH mande jistis

Pòtoprens, lendi 26 novanm 2018 .- Asosyasyon dwanye ayisyen yo (ADH) mande pou otorite yo kreye yon komisyon ankèt ak objektif pou bouske laverite sou eskonbrit samdi pase a (24) nan dwàn Malpas la kote 4 ajan dwànye ak 2 lòt sitwayen te jwenn lanmò yo.

Nan nòt sa ki pote dat 25 novanm, pòt pawòl ADH la, Michelson Nelson eksplike komisyon sa ap fòme ak reprezantan Ministè ekonomi ak finans (MEF), Administrasyon jeneral ladwann (AGD), yon manm sosyete sivil la ak yon reprezantan òganizasyon kap defann dwa moun yo.

Michelson Nelson mande pou Leta ayisyen :

-Pran 3 mwatye jounen dèy pou salye memwa ajan dwanye yo ki mouri nan egzèsis travay.

-Òganize lantèman nasyonal nan lonè ajan dwanye yo.

-Akonpaye paran ak tout pitit viktim yo.

-Ogmante grad yo menm aprè lanmò yo.

-Fèmen pòt ladwan Malpas la annatandan kondisyon sekirite yo tabli.

-Pibliye nan yon ti tan tou kout Estati patikilye ajan dwanye yo.

Pou fini, Asosyasyon dwanye ayisyen yo (ADH) mande 3 jounen refleksyon nan tout biwo ladwann depi lendi 26 pou rive mekredi 28 novanm .