Kreyòl Enfo, 20 avril 2020 .- Premye minis Joseph Jouthe konfime, jodi a, twa (3) pami 68 konpatriyòt ayisyen Etazini te voye retounen nan peyi a 7 avril pase a kontamine ak nouvo kowonaviris. Moun ki enfekte yo deja anba kontwòl Ministè sante piblik ak popilasyon.
Gwo tansyon te eklate, ayè aprè midi, nan moman anbilans ministè Sante piblik te vin pran 3 moun ki enfekte yo nan otèl kote depòte yo te fèmen ankarantèn nan. Plizyè nan depòte yo konteste rezilta egzamen MSPP a. Yo te fè anpil bri epi frape tout sa ki nan otèl la.
Chèf gouvènman an presize tou 65 lòt ayisyen ki fèmen ankarantèn nan otèl la kapab rantre lakay yo demen madi a si yo pa montre okenn sentom kovid-19 la.
Dènye bilan MSPP pibliye dimanch 19 avril la konfime viris la deja touye 3 moun epi kontamine 47 sitwayen nan peyi a. Ak 27 ka, lwès rete depatman kote nouvo kowonaviris la plis touche.
Kreyòl Enfo