2021, sitwayen ameriken yo ap bezwen viza pou vwayaje sou kontinan ewopeyen an

Kreyòl Enfo, 11 mas 2019 .- Iniyon Ewopeyèn anonse vandredi 8 mas pase a « tout ameriken k ap vwayaje nan yon peyi ewopeyen ki nan espas Schengen nan ap bezwen yon ETIAS (European Travel Information and Authorization System) ». Yon dispozisyon ki vize amelyore sekirite a nan peyi ewòp yo epi evite plis pwoblèm imigrasyon ilegal ak teyorism.

Medya ameriken yo rapòte, mezi sa ki te vote nan palman ewopeyen an depi nan mwa jen 2018 ap kòmanse aplike nan lane 2021. Pou kounye a, sitwayen ameriken yo kapab kontinye vwayaje sou kontinan ewopeyen an san viza.

Pou benefisye viza Schengen sa k ap dire 3 zan, ameriken yo ap gen pou ranpli yon fòmilè anrejistreman sou entènèt, yon paspò ak yon kat kredi oubyen debi pou peye lajan pou etidye dosye a.

Kreyòl Enfo