2 jèn fi pami yo yon polisyè mouri nan aksidan machin

Kreyòl Enfo, 5 dawout 2019 .- Marie Bettyna Jacques ak Ania Floriant se non 2 jèn fi ki pèdi lavi yo nan yon aksidan machin, ayè dimanch 4 dawout la, sou wout nasyonal nimewo 1 an (RN1), zòn Akayè, depatmant Lwès.

Daprè enfòmasyon ki rive jwenn Kreyòl Enfo, aksidan sa fèt pandan yon gwoup fanm ki te nan yon machin t ap soti nan festival Bikini nan plaj piblik la. Machin mèdam yo te ladan l la chavire pandan chofè a t ap tante epanye yon motosiklèt sou wout la, daprè kèk temwen.

Youn nan viktim yo, Marie Bettyna Jacques, se yon ajan ki soti nan 29e pwomosyon Lapolis la. Ania Floriant, lòt jèn fi ki pèdi lavi l pandan dram nan t ap pare pou fete anivèsè l 11 septanm k ap vini la a.

Plizyè lòt fi kite nan machin nan soti blese tou pandan aksidan sa.

Kreyòl Enfo