179 Ayisyen ki t ap viv Chili ap retounen Pòtoprens, lendi 26 novanm lan

Pòtoprens, dimanch 25 novanm 2018 .- Dezyèm vwayaj Ayisyen k ap viv Chili ki te enskri nan pwogram gouvènman chilyen te mete sou pye pou pèmèt migran ki vle retounen nan peyi yo san depanse yon pyas la ap fèt lendi 26 novanm nan.

Plizyè medya chilyen presize 179 konpatriyòt ki konsène nan dezyèm vwayaj sa dwe prezante nan biwo imigrasyon ansanm ak papye pou kite peyi a, paspò ansanm ak deklarasyon kote yo sèmante a depi 7:00 tè nan maten, si yo pa vle pèdi avyon an. Pandan premye vwayaj 7 novanm pase a, 55 ayisyen te oblije rete Chili akoz yo pat ranpli tout kondisyon gouvènman an te fikse.

Leta chilyen espere, fwa sa, tout Ayisyen ki ta dwe retounen Pòtoprens pandan dezyèm vwayaj la ranpli tout kondisyon yo.

179 konpatriyòt sa yo ta dwe debake nan ayewopò Tousen Louvèti, Pòtoprens, nan mitan latwoublay kote divès sektè anonse yon grèv jeneral nan lide pou fòse prezidan Jovenel Moise kite pouvwa a.