104 « Congressman » ameriken reklame yon ankèt sou PetwoKaribe ak vyolans k ap fèt sou moun Ayiti

Kreyòl Enfo, 29 mas 2019 .- Nan yon dosye yo voye bay Sekretè Leta ameriken an mèkredi 20 mas pase a, 104 depite (congressman) ameriken mande yon ankèt sou dosye OetwoKaribe ak vyolans ki fèt sou sitwayen k ap manifeste kont gouvènman ayisyen an.

Ansanm congresseman ki siyen lèt la mande sekretè Leta ameriken apiye yon ankèt endepandan sou pouvwa Ayiti a « pou limyè fèt sou rimè kòripsyon ki debouche sou gwo kriz ki genyen kounye a ansanm ak dwa moun k ap pase anba pye, kote menm gen plizyè moun yo asasinen « .

« Pou pwoteje pèp ayisyen an, Etazini dwe mennen ankèt sou kòripsyon ak dwa moun gouvènman ayisyen ap pase anba pye, epi ranfòse kominikasyon ak Kongrè a sou kòman sitiyasyon ap avanse », toujou daprè sa ki nan lèt la.

Depite Andy Levin ak Babara Lee ki pran inisyativ pou mande ankèt sou otorite ayisyen yo pa kache kè sote yo genyen pou zak vyolans k ap fèt sou sitwayen k ap manifeste. Yo regrèt tou move konsekans mouvman « peyi lòk » la te genyen sou ekonomi peyi a.

Pou pi piti 27 moun te mouri anba bal pandan gwo mobilizasyon pou egzije demisyon Jovenel Moise sou pouvwa ki te demare 7 fevriye pase a, daprè Komisyon peyi ameriken yo pou dwa moun (CIDH).

Kreyòl Enfo