《Bonda chire, kokorat 》: Roro Nelson salanbe epi menase jij Dieunel Luméran

Pòtoprens, samdi 8 desanm 2018.- Ronald《Roro》Nelson, bra dwat ansyen prezidan Michel Joseph Martelly, voye jete òdonans jij Dieunel Luméran soti, 3 desanm 2018 la, sou dosye dividal zam otorite yo te sezi sou waf Senmak la.

Nan yon mesaj vokal k ap fè laviwonn rezo sosyal yo, Roro Nelson salanbe majistra enstriktè Dieunel Luméran epi fè kwè l ap travay pou yon senatè.

Mouche Nelson ki di li se « yon chèf » ki dwat deklare《 ti jij kokorat sa, ti jij bonda chire sa (…) ki chwazi pou l site non m nan, fenk site yon move non》. Roro Nelson rapouswiv pou di 《 lè w site non m se pou malè rive w 》.

《 Mwen pap mawon, se jij la ki pou kite peyi a (…) Se pou banm fòkenn peyi sa, (ke w) chèche yon fòkenn egzil pou ale》, pawòl Roro Nelson.

Nan òdonans jij Dieunel Luméran rann 3 desanm pase a li lonje dwèt sou Ronald Nelson, Vladimir Paraison, Reginald Delva, Durand Charles, Jimmy Joseph, Junior
Joël Joseph ak Monplaisir Eduard kòm 《 sispèk ki nan mawon ( inculpés fugitifs). Yo ta mele nan trafik zam, kontrebann, blanchiman lajan ak lòt ankò.

Kreyòl Enfo